مجاراة لقصيدة (يامعلقين الذيب)

قصيدة (يا معلقين الذيب) للشاعر: رباح بن ناجي العروي

يا معلقين الذيب بأطراف رجليه == بالله وش سوى بكم تذبحونه

كلٍ يجرب به سلاحه ويرميه == تبغون فيها مدح وتعلقونه

صرتوا عليه قروم والجوع حاديه == وألا بدون سلاح ما تقربونه

الذيب ذيب ويرفع الرأس طاريه == والقرم ما يرضى عليه المهونة

وإن كانه أخطى ما يعرف المشاريه == الله يحب الستر لا تصلبونه

يا ما من الحاجة سرينا مساريه == ويا ما لبسنا ثوب شكله ولونه

نرقب مراقيبه ونبدي مباديه == وانشوف كل اللي تشوفه عيونه

إما وراء اللي ينقش الوشم بيديه == ولا وراء اللي عاقباته قرونه

خلوه يستانس بعمره ويقضيه == لو من طراة البر لا تحرمونه

غفوة على رأس المراقيب تكفيه == في رأس رجمٍ يقصر الشوف دونه

ماعاد باقي بدو يكفيه ما فيه  == خلوه وسط البر يأكل جنونه

قصيدة المجاراة للشاعرة : صالحة بنت عبد الله ظافر الغامدي

هيضني الشاعر وّدي نجاريه == يوم أن ظني يتفق مع ظنونه

يقول ذبح الذيب ما هو بمرضيه == بعد وراهم في الشجر يصلبونه

ياللي تشاكي الذيب حنا نشاكيه == وأنا معك روحي لروحه حنونة

وأنا بزيدك بيت شعر ومعانيه == الذيب ما حسبت العرب يسجنونه

لاهو بإرهابيٍ ولا يشتبه فيه == ولا أسير الحرب يستاسرونه

عادت مربية الدواجن تربيه == صكوا عليه الشبك ويقفلونه

اللي من أول مايدانون طاريه == اليوم عادوا في القفص يحملونه

اليوم ذيب البر هذي تواليه == والصقر من لا يعرفه يشتوونه

الله عليك الذيب واللي يشاذيه == ترا عيال البادية يشبهونه

ترا هقاويهم تشاذي هقاويه == وتراهم أطيب منه ما هم بدونه

الله كم رجمٍ بدا في علاويه == يعوي إلين إنه يفيّح كنونه

وإلا عوى كم من سباعٍ تلاحيه == وحنا ترانا عارفينٍ لحونه

نعرف صدى صوته ونعرف مواطيه == وعلى سنا الكشاف نعرف عيونه

يا زين رُوجامه يَنُوقِل خطاويه == يشذي لسيفٍ ساع ما يجردونه

وإلا التفت يمك لا كنّ أذانيه == كافور غرسٍ طالعٍ من ركونه

وإلا أرخى متونه هم سبّح بأياديه == كنه بصف العسكر يدربونه

وإلا فز صقرٍ طار من كف راعيه == وإلا السهم من رميةٍ يطلقونه

الله يا كم نشر بدوٍ يفاجيه == ويا كم خزيلٍ مابقى ألا شنونه

وكم ليلةٍ يضوي وحنا نسرّيه == وراه من يرمي ومن يرجمونه

يقعد شهر وأيام والجوع طاويه == ولا صادف الغِرّات مكّن طعونه

الذيب بعد البدو لا عاد ترجيه == البدو صاروا حضر ما يعرفونه

يا بو فهد تكفون وش النظر فيه == ما تكتبه في الجيش وتوظفونه

خله يرُوجِم والسرايا تباريه == عليه من طبع العساكر مرونة

نابه ومخلابه سلاحه يكفيه == وعن بدلة العسكر يكفيه لونه

من قصائد الشاعرة : صالحة بنت عبد الله بن ظافر الحلي الغامدي

مدونة ديوان شاعرة