يالله إني طالبك يا إلهٍ تستجيب


يالله إني طالبك يا إلهٍ تستجيب == يا مجيبٍ للدعاء والرجاء ما تقطعه

فاح صدري مثل ما فاح براد الحليب == فاح من كثر الحرارة ومحدٍ ردعه

قربوا جمره وخلوا يصلاه اللهيب == احترق الأبريق واللي في جوفه رجعه

جر قلبي جر دلوٍ يجر من القليب == امتلى بالماء وراعيه يلّه طلعه

زاحموه الوِرد والعدّ ما ماه بقريب == واحدٍ يدلى بدلوه وواحد ينزعه

ورد بدوٍ حدهم قيظ والموقف صعيب == كل راعي ذود جايٍ بذوده يجمعه

كن حنة حشوهم ذيبةٍ تعوي لذيب == كل من يسمع عواها تعيد تروعه

ذيبةٍ تبغى العشاء مير حدوها العزيب == من متاهي جايعة والجراة مجوعة

والله إني ريت في ذا الزمن شي غريب == الذي شفناه بالعين واللي نسمعه

جننوا الصاحين واللي على الننة يشيب == يا زمان الهجولة يا زمان القرقعة

كثرت الأمراض وأزرى يعالجها الطبيب == القلوب أوجاع وأسبابها متنوعة

ما يطيب الجسم لا عاد في قلبه دبيب == لا تعالج واحدٍ والدواء ما ينفعه

الله وأكبر من متاني وأنا أدور صحيب == ما لقيت اللي صفت نتيته وأمشي معه

وين يصفي واحدٍ من وراه أمحق نصيب == كل ما شافه بيصلح يغزه بأصبعه

كم بذلنا الطيب في واحدٍ جحاد طيب == يذكر الحقرة وباقي جميلك ضيعه

لو حلفنا له برب المصاحف يستغيب == ما يطعيك مير خل الزمان يطوعه

الله الله يا هل الرأي والشور الصليب == كل من فيه الثقة جعل ربي يمنعه

والله أن عندي طموحه ولي قلبٍ لبيب == والزمن ما هو بصنعة يدانا نصنعه



من قصائد الشاعرة : صالحة بنت عبد الله بن ظافر الحلي الغامدي


مدونة ديوان شاعرة

ليست هناك تعليقات:

إرسال تعليق