ألا يالله إني رافع يمك النظر == ياعالمٍ بأسرارنا اللي نخفيّها
سبحانك الله كم طوينا من الدهر == لياليٍ نودعها والأخرى نحييها
وطانا الحفا والشوك والرمل والجمر == إلين اشتكن رجولنا من سماريها
مشينا في الظلما وفي الشمس والقمر == ومشينا في الرمضا و في حر صاليها
مشينا في الروض ومشينا في العسر == رقينا الجبال اللي تعنّي مراقيها
راعانا الغنم والبل ونتبع بها المطر == ومن حيث ماتاجي الصلة مانخليها
نزلنا البوادي في بيوت من الشعر == نجوس الأراضي والمواشي نربيها
مانا من القربة وضوءٍ من الشجر == وبيوتٍ من غزل المواشي نسويها
نسوي المضير ونحمِي السمن بالحجر == نخض اللبن ومنه الدهانة نصفيها
نعرف الشحم والرز والبر والتمر == ونعطي الضيوف أحلى المعاوش وغاليها
ولدنا يعرف الذيب والنمر والصقر == عصاه وألا بندقه ما يخليها
يخاوي السباع وقلبه أقسى من الصخر == يسري مساريها ويضوي مضاويها
بنات البدو متعلمات على الخدر == إيلا قالوا الخدرة خدرها مسميها
شعرها على سرجوفها كنه الحثر == تغطيه بالشيلة ويالله يغطيها
وملابس ستيرة لا قصافة ولا قصر == على جسمها من متنها لمواطيها
جمال طبيعي خلق من صورة البشر == مامرت المشغل لأدوات تشريها
أنا أشهد أن البدو والبادية فخر == وجودي على ذيك الليالي وطاريها
لكن يوم البادية راح واندثر == تركنا الغنم والبل ولا عاد نبغيها
فيما بنا بدوٍ لا ربعنا حضر == تطاول مربية الغنم في مبانيها
طلع ورعهم مايعرف البل من البقر == على سيكله والكورة اللي يدربيها
بعض العذارى لبسهن كنه العرا == الكاسيات العاريات افطنوا فيها
تكوفر شعرها فوق ماياصل النحر == وأخاف أسنمات البخت هاذي مواريها
على الموضة اللي جاتنا من ورا البحر == تقاليدنا مدري وراها تخليها
تقلد بنات الغرب يامنظر القشر == ورا ماتقلد عايشة في مساعيها
تجنب عن اليمة وتمشي على ورا == علشان شلتها يشوفن غابيها
يشاف الظهر مكشوف والساق من حدر == عن أيام تطلع والملابس تخليها
والأم برّى كن ما عندها خبر == صارت زميلة بنتنا اللي تمشيها
وبوها وخوها مايشوفون ما جرا == مناظر تشيب عين من ينتظر فيها
نصحنا وعلمنا وياما من القهر == ولا عاد ندري روسنا وين نغديها
نجامل على الدنيا وتبغى لها صبر == دنيا مرارتها تساوى بحاليها
واحد نبارك له واحد على القبر == وناسٍ تعزينا وناسٍ نعزيها
عسى الله يصبرنا ويكتب لنا الأجر == ترا الصبر مفتاح الفرج عند تاليها
نسأل الذي لا عظمت ذنوبنا غفر == يغَفِر الذنوب برحمة منه نرجيها
وصلاتي وتسليمي على سيد البشر == هاذي كلمتي دايم وقلبي يجاريها
من قصائد الشاعرة : صالحة بنت عبد الله بن ظافر الحلي الغامدي
مدونة ديوان شاعرة
ليست هناك تعليقات:
إرسال تعليق